好榮幸同中華遊樂會( Chinese Recreation Club) 合作,上兩星期一連3日的” 環球美食「餸」比你”已經完滿結束,呢3日係好好的經驗,未試過一次過教咁多位小朋友,由諗菜式、流程、分工同示範比起平時教大人係好唔同,少D EQ同耐性都唔得,而且要好細心同有耐性…..見到班小朋友煮得開心,又喜歡我教的環球美食,好開心呀! 佢地個個對住親手煮好的美食都唔捨得即刻食,用食物盒載好話要攞返屋企同爸爸媽媽分享,好乖呢!
呢個係我同埋小朋友其中一個好喜歡的菜式,當佢地一見我張一張硬綁綁的米紙浸水變軟便好驚訝,好似變魔術咁,個個都捲得好開心。這個口味清新的夏日小吃真係大人細路都喜歡。
另外要多謝邦女,多謝佢的熱心介紹我才有這開心難得的經驗。
材料 :
米紙 6張
香茅豬肉 6片
熟蝦(去殼挑腸) 12隻
米粉 50克
青瓜(切幼絲) 1/2條
紅蘿蔔 (切幼絲)1/2條
芫荽適量
越南 薄荷葉 適量
韭菜(可不加)6條
蘸汁 :
- 蒜頭(切碎) 1粒
- 紅辣椒(切碎,或可增減)1茶匙
- 椰糖(磨碎)2湯匙
- 青檸檬汁 2湯匙
- 魚露 2湯匙
- 白醋 1湯匙
- 水 5湯匙
做法 :
- 把米粉放入滾水煮軟,之後冲冷凍水,瀝乾水分。備用。
- 把所有汁料材料拌勻,直至椰糖完全溶解。備用。
- 香茅豬肉煎至兩面微黃色,並熟透,備用。
- 用一大碗盛熱水,把米紙稍泡浸幾秒,直至轉軟身。置一碟上,放兩隻熟蝦在中央,之後鋪上豬肉,適量米粉,青瓜絲,紅蘿蔔絲,薄荷葉,芫荽,韭菜,包裹好即成。蘸汁料享用。