肉腸可算是我雪櫃的良伴，因為它可以配一日三餐，煎兩條腸配煎蛋便成為早餐，煮公仔麵 時可以加入，令沉悶的公仔麵立即變得味，又可以用 來煮意粉。
但我覺得最完美的食法是配上cremy 的薯蓉，英式酒吧的menu一定可以找到這道菜，但一 般都只是配上gavy。今次用的是“魔鬼醬”，一聽個名已經想像到有幾好味！
雖然好味到停不了口，但實在太魔鬼又高卡，食完好guilty呀!要做一點運動才行!
材料: (2人分量)
肉腸- 4條
紅蔥頭 2粒 (切粒)
薯蓉：
薯仔 300 g
牛油 20g
牛奶 40-50 ml (微暖)
法式芥末1茶匙
鹽、黑椒少許
魔鬼醬：
洋蔥半個
甘荀半條
西芹半根
煙肉 15g
牛油 15g
中筋面粉 15g
牛肉高湯250g
白酒75g
茄膏1湯匙
百里香1棵
月桂葉 1塊
番椒粉少許
做法:
I) 薯蓉：
1.將薯仔去皮，放入加了鹽的滾水，煮20-30分鐘至薯仔變軟，用牙籤拮一拮，能輕易拮入便行。
2.薯仔瀝乾水，放在大碗中，用壓薯蓉器壓成薯蓉，加入牛油拌勻，再慢慢加入牛奶至creamy狀，再加法式芥末、鹽和黑椒調味。
＊ 煮好味的薯蓉的秘訣是要試味，試味後才能決定放多少調味料!
II) 魔鬼醬：
1. 將所有材料切粒。
2. 下少許油，倒入煙肉和所有蔬菜用中火炒至金黃色。從鍋中拿起所有材料(盡量把炒出來的油留在煱)，再加入牛油。
3. 用中火融化牛油後加入面粉攪拌至可樂色。
4. 轉小火後慢慢加入牛肉湯並用力攪拌，再加入茄膏和白酒，攪拌至茄膏溶掉。
5. 將(1.)炒過的煙肉和所有蔬菜放回鍋裡並加入百里香和月桂葉，用小火煮15-20分鐘。加入番椒粉。
6. 用過濾網過濾醬汁備用。
7. 燒熱平底鑊，下油，下紅蔥頭炒至軟身，將紅蔥頭加至醬汁裡。
最後：
1.用同一個平底鑊，下油，煎肉腸至熟，其間不斷翻轉，令每一面都煎至金黃色。
2.將薯蓉放上碟中，再放上煎好的肉腸。淋上醬汁即可享用。
*剩餘的醬汁可以放入雪櫃保存多天，用來煮意粉一流呢!
